EBAZPENA, 2007ko urriaren 5ekoa, Portu eta Itsas Gaietako zuzendariarena, Mundakako portuan (Bizkaian) profesional ez diren aisia-ontzien titularrei amarralekuak erabiltzeko aldi baterako baimenak emateko dei publikoa egiteko dena.
RESOLUCIÓN de 5 de octubre de 2007, del Director de Puertos y Asuntos Marítimos, por la que se anuncia convocatoria pública para el otorgamiento de autorizaciones temporales de uso de puestos de amarre por los titulares de embarcaciones de recreo no profesionales en el Puerto de Mundaka (Bizkaia).
Mundakako portuan (Bizkaian) kirol-ontziak buietan amarratzeko instalazioak daude, baina horiek okupatu ahal izateko, lehenengo, eskumena duen portu-administrazioak kasuan kasuko baimena eman behar du.
Amarralekuak erabiltzeko aldi baterako baimenak emateko prozedura Garraio eta Herri Lan sailburuaren 2004ko apirilaren 20ko Agindu bidez arautu zen (2004ko maiatzaren 28ko EHAA, 100. zenbakia); eta Agindu horren 3. artikuluak ezartzen duenez, amarralekuak eskatzeko epea noiz irekiko den, Portu eta Itsas Gaietako zuzendariaren ebazpen bidez iragarriko da.
Beraz, Portu eta Itsas Gaietako zuzendariak, Garraio eta Herri Lan Sailaren egitura organikoa eta egitekoak finkatzen dituen urtarrilaren 15eko 20/2002 Dekretuak emandako ahalmenak erabiliz,
EBATZI DU:
1.– Mundakako portuan dauden buietako amarralekuak aldi baterako erabiltzeko baimena esleitzeko deia egitea. Baimenak 3 urterako emango dira, eta epe hori noiztik aurrera kontatu behar den, kasuan kasuko baimenean adieraziko da.
2.– Deialdi honen bidez, Mundakako portuko 191 amarraleku eskaintzen dira:
– 123 amarrraleku barruko buietan, honela banatuta:
* 107 amarraleku 6,50 metro arteko luzera edo 2,3 m arteko zabalera duten ontzientzat.
* 16 amarraleku 11 metro arteko luzera edo 3,2 m arteko zabalera duten ontzientzat.
– 68 amarraleku kanpoko buietan, amarraleku bakoitzaren ezaugarrien arabera zehaztu beharko den luzera eta zabalerako ontzientzat.
Portuaren kanpoaldeko buietako amarralekuak urte-sasoi jakinekoak izango dira, eta zehazki maiatzetik irailera bitartean erabili ahal izango dira soilik. Barruko buietako amarralekuak urte osoan erabili ahal izango dira.
Portu eta Itsas Gaietako zuzendariak, eskainitako amarralekuetatik, barruko buietako bost, eta kanpoko buietako beste bost, eskatzaileen ontzien zabaleraren arabera behar diren egokitzapenak egiteko gordeko ditu.
3.– Eskabideak aurkezteko epea.
Eskabideak aurkezteko epea Ebazpen hau Euskal Herriko Agintaritzaren Aldizkarian argitaratzen den egunaren biharamunetik hasi eta 15 egun naturalean amaituko da, eguerdiko 12:00etan.
4.– Eskabideak aurkezteko lekua.
Eskabideak Bizkaiko Portuen Lurralde Zerbitzuan (kale Nagusia 85, 8.a, 48011 Bilbao) edo Portu eta Itsas Gaietako Zuzendaritzaren bulegoetan (Donostia kalea, 1, Lakua I, - 7.a 01010 Vitoria-Gasteiz) aurkeztu ahal izango dira, horrek ezertan galarazi gabe Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 38.4 artikuluan ezarritakoa.
5.– Aurkeztu beharreko eskabide-orriak eta agiriak.
Eskabidea egiteko eredua, Bizkaiko Portuen Lurralde Zerbitzuan (kale Nagusia 85, 8.a, 48011 Bilbao) edo Portu eta Itsas Gaietako Zuzendaritzaren bulegoetan (Donostia kalea, 1, Lakua I, 7. solairua, 01010 Vitoria-Gasteiz) jaso ahal izango da, edo nahi izanez gero, Eusko Jaurlaritzaren www.euskadi.net interneteko webgunetik ere atera daiteke, Garraio eta Herri Lan Sailaren atalera jota.
Eskabideekin batera Garraio eta Herri lan sailburuaren 2004ko apirilaren 20ko Aginduaren 4.2 artikuluan ezarritako agiriak aurkeztu beharko dira, (Agindu horrek Euskal Autonomia Erkidegoaren portuetan eta portu-instalazioetan profesional ez diren aisia-ontzien titularrei amarralekuak erabiltzeko aldi baterako baimenak emateko prozedura arautzen du).
6.– Baimenak esleitzeko ere, Garraio eta Herri Lan sailburuaren 2004ko apirilaren 20ko Agindu horretan ezarri prozedurari jarraituko zaio.
Eskatzaileek gogoan izan behar dute, Agindu horren 9.3 artikuluaren arabera eskabideak aurkezteko epea amaitzen den egunean Portu Administrazioarekin zorrak dituzten eskatzaileei ez zaiela amarralekua erabiltzeko baimenik emango.
7.– Deialdi honetan parte-hartzaile asko izatea espero denez, prozedurari amaiera ematen dioten ebazpenak kenduta, gainontzeko jakinarazpenak Bizkaiko Portuen Lurralde Zerbitzuko iragarki-oholean jarrita egingo dira; bereziki aipatu beharrekoak dira: osatu beharreko agirien zerrenda eta agiri horiek aurkezteko 10 egun balioduneko epea emateko iragarkia (beharrezkoa bada behintzat), onartutakoen zerrenda, zozketa publikoa egiteko eguna, eta deialdian zehar gerta litekeen beste edozein gorabehera.
8.– Eskatzaileek ematen duten informazio guztia fitxategi batean gordeko da, eta Mundakako portuko amarralekuak aldi baterako emateko baimenen kudeaketarako soilik erabiliko da. Fitxategi horren erabilera eta jarduera Datu Pertsonalak Babesteko abenduaren 13ko 15/1999 Lege Organikoaren aurreikuspenetara egokituko da.
Vitoria-Gasteiz, 2007ko urriaren 5a.
Portu eta Itsas Gaietako zuzendaria,
JOSEBA ANDONI IDOIAGA URIBE.
| 